"Beten wat öber us !"

Wie kummt so eene Theatergruppe öwerhaupt tostande?

Eenen goden Tages seten Sophie, Heide und Peter bi Werner anne Theke un snackten öwer ole Tieten in Moslesfehn. So keem dat ok dat Sophie vertellen de, dat dat glieks nan Krieg eenigemale plattdütschet Theater geben hett, wo se sülmst mitspeelt hett und dat se geern mol wedder speelen much. So keem dat,dat ut ditt Gespräch rut de Idee för de Gründung von de "Speeldeel Moslesfehn" keem. Dor Peter de letzten Johrn in Bloherfelde speelt hätt, is he to usen Speelbaas ernannt wurrn, un so hett he ok de Regie för dat erste Stück öwernahmen. As sick dat rumsnacken de, dat sick eene plattdütsche Theatergruppe bild har, weer dat Interesse groot int Dörp, und furs hebbt sick ok wietere Mitspieler infunn. De Mitspeeler bi dat erste Stück weern uter Heide und Sophie noch Hans-Hermann Höfel, Kalli Wiedau, Gisela Osterloh, Werner Gnodtke, Veronika Schlösser (nu heet se Brock) un Marga Heiber at Topustersche. Dat Stück muß noch mol wedderholt weern, weil Büsselmanns Saal ton breken full weer, und nich all Lüüd Korten kregen harrn.

Nun sind wi 16 Speelers de sich jedet Johr freut woller een neet Stück intoüben. Wenn ok de eene oder annere mol utsetten deit, so sind dor doch immer noch noog Mitspeelers dor. Dat heet - so ganz stimmt dat ok nich - denn wenn mol de "jugendliche Liebhaber" oder "Jungknecht" utfallen deit, wat dat schwierig de Rull to besetten, dee wie hebbt bloß eenen jungen Kerl in use Mitte. Also "Jung-Kerls" wenn ji Lust hebbt to speelen und öber 18 Johr old sind un joe Utbildung afschlaten hefft, denn meld jo mol bi us. Wie geiht dat denn jetzt in use Theatergruppe so vonstatten?

In Fröhjohr, meist so in März, drapt wi us un besnackt dat ole un dat nehe Johr. Denn besnackt wi weer mitspeelen will, un denn wat dat Stück na de Personenzahl utsögt. In Juni oder in Juli maakt wi use Radtour wo wi denn ok irgendwo inkeert un us dat schmecken laat. In August werd dann de Rullenböker verdeelt un de Rullen besproken. In Oktober geiht dat denn woller mit dat üben los, to Anfang sind wie noch bi irgendjemann to Huus un denn gaht wi ok bald bi Werner in Saal up de Bühn. Ende November hebbt wi denn use Upführungen, de sick bit Anfang Dezember hentrecken dot. In disse Tied kann dat ok'n beten hektisch weern. Aber wenn wi denn achteran up use Wiehnachtsfier woller mol faststellt dat alles woller wunnerbar klappt hett, denn könnt wi in Ruh' Wiehnachten fiern. In Januar makt wi noch use Kohlfohrt un denn is dat Theaterjohr vorbi.

So geiht dat bi us, un wer Interesse hett bi un mittomoken, entweder bi'n Bühnenbo oder sonst irgendwatt, de kann us ruhig mol anspreken, denn wi nehmt ok passive Mitglieder op. Dat schall genügen. Denn bit dorhenn, un snackt platt, wi dot dat ok, un dat makt Spaß.